2007-12-31

Dolĉa Rizo, Koimbro-stila recepto

Kiel promesite, jen la recepto por prepari Dolĉan Rizon.

Ingrediencoj

por 6 personoj

  • 250 g da rizo
  • 1.5 l da lakto
  • 250 g da sukero
  • citronŝelo
  • pulvora cinamo

Preparado

  1. Boligu la lakton kun la citronŝelo.
  2. Dume, varmigu 2 dl-ojn da akvo en poto. Kiam ĝi boliĝas, aldonu la rizon.
  3. Post bolkuiri ĝin dum 3 aŭ 4 minutoj ekaldonu la lakton. Dum oni malrapide aldonadas la lakton, nepras ĉiam kirli (malrapide, per lignkulero). Tio daŭros pli ol unu horo.
  4. Iam aldonu la sukeron. Atentu, tiam la rizo ne plu bolkuiriĝos, kaj bona rezulto estos rizo nek tro mola nek tro malmola.
  5. Daŭre bolkuiru la miksaĵon. Ĝi iĝos pli kaj pli densa. Denove, tio estas arto; ĝi estu nek tro flua nek tro densa. Vi devas ĉiam kirli aŭ ĝi gluiĝos al la poto. Uzu malfortan fajron. Postulas multe da pacienco tiu ĉi dolĉaĵo.
  6. Finfine surŝutu ĝin sur telerojn kaj aldonu la cinamon.

Frandumado

Manĝu ĝin tuj varman, manĝu ĝin poste malvarman, manĝu ĝin eĉ post unu aŭ du tagoj. Tiu ĉi dolĉaĵo, kiam bone preparita, bongustas ĉiam kaj ĉiel.

5 komentoj:

Zarolho said...

Dankon pro la “sekreto”! :-)

Atentu tamen, “s-ro inĝ-ro”, ke inter valoro kaj (S.I.) unuo nepras spaco, nerompebla spaco, tiel ĉi: 250 g ("250 g").

Cetere, kian rizon vi rekomendas? Antaŭ nelonge mi spertis kiom multe influas la rezulton de tute sama kuirprocedo tio ĉu oni uzas na carolino aŭ na agulha

Fine, lingvan rimarkon: kontrolu la vortojn "kirli" kaj "[sur]ŝuti", eble pli trafaj.

Luís said...

Fakte, estonta inĝeniero devintus scii pri tiaj stilnormoj! Aĥ.

Mia patrino uzas na “Saludães Oriente Extra-longo Branqueado” (ruĝa pako). Mi ne certas ĉu tiu rizo estas carolinoagulha sed ŝi diras ke carolino pli bonas. Mi devas iam demandi al mia avino kian rizon ŝi uzas.

Mi ŝovis la vortojn "kirli" kaj "surŝuti" en la blogeron, espereble ne tute maltrafe. :-)

Luís said...

Post kelkaj jaroj da sperto... La rizo estu Carolino do Mondego por pli bona, kaj vere Koimbro-stila, rezulto. :-)

Luís said...

🤔 Mankas sukero. Verŝajne 250 g aŭ pli taŭgas .

Luís said...

Mi ĝisdatigis la kvanton de sukero de 100 g al 250 g.

Kategorioj